مسلسل سمسار فايف ستار ح 11 -15

                       (الحلقة الحادية عشرة)

م/1

      بدار00 (بفرحه) ابسطى يا مستكه ابسطى..

   مستكه00 اهيه مالك راجع من بره مبسوط كده ليه يابدار..

      بدار00 ابومامادو بيض وشى .. فريق النخيل اللى كان بيراهن معايا

               عليه .. كسب النهارده واللى جاب الجون هو  مامادو..

  مستكه00 (بفرحه) ياسلام ايوه كده .. والله وعملوها الرجاله..

     بدار00 شوفى تفكيرى..

  مستكه00 انت عليك عقل يوزن بلد.. بس ياخويا الكابتن حنفى ده

               اداك الفلوس الباقيه ولا لاء..

    بدار00 لسه..

  مستكه00 اه ياخوفى يابدران..

    بدار00 (مقاطعا) لاء ماتخليش عقلك يروح لبعيد.. دا هو بس فى المستشفى

               يوم ولا اتنين وطالع ..

 مستكه00 اهيه وفى المستشفى ليه بقى..

    بدار00 اصل لما مامادو جاب الجون من فرحته اغمى عليه.. ونقلوه

              على المستشفى..

 مستكه00 طيب خلى بالك لا يكون بيعمل كده علشان يملص منك وميدكش

               باقت الفلوس .. ويبقى يازيد ماغزيت..

                                          - موسيقى-

م/2

مستكه00 اسمع بقى يا بدار.. انت بقى يا خويا لازم تتشهر اعلاميا ..

   بدار00 قصدك ايه يامستكه..

مستكه00 قصدى ان الموضوع ده عملك شهره بس شهره مخفيه..

   بدار00 برضه مش فاهم.. وضحى كلامك ..

مستكه00 هوضح.. بقى انت علشان تظهر بصوره لمعه للنوادى ومراكز

             الشباب وكل ده لازم صورتك على الاقل تظهر لهم ويعرفوا انك

             شغال فى الكار ده مصبوط  يقوموا يجولك ويطلبوا منك تجيب

             لهم لاعيبه..

   بدار00 فهمتك فهمتك يامستكه..قصدك انى اخلى واحد صحفى يلمعنى

             ويعملى روبورتاج فى الجرايد مش كده..

مستكه00 ايوه كده تمام.. وليك عليا انا كمان هعملك احلى شغل على النت

             وهقول لكل رياضى فى مصر ان بدار هو السبب فى فوز فريق

             النخيل على الاحلام وهاحكى لهم حكايتك.. وشوف بقى

             الفيسبوك هيخلى فضحتك بجلاحل.. قولت ايه..

   بدار00 عندك حق يا مستكه.. يبقى مفيش الا فرجانى ابو فرجانى..

مستكه00 مين فرجانى ده..

   بدار00 ده واحد هاوى صحافه وله معارف كتير بيشتغلوا فى جرايد..

            وطبعا لما اقوله على اللى انا عاوز اعمله ميتوصاش بقى.. هيبقى

             سبق صحفى من الطراز الاول..

                                   - موسيقى-

   

م/3

                (صوت حركه فى قهوه)

     بدار00 ازيك يا فرجانى..

 فرجانى00 اهلا وسهلا يا استاذ بدار.. عاش من شافك يا اخى انت فين..

     بدار00 انا موجود .. لكن حصلى تطورات جذريه فى حياتى علشان كده

               انشغلت شويه..

 فرجانى00 الله يكون فى العون..

      بدار00 عايزك تمخمخ معايا شويه كده علشان عايزك فى خدمه صحفيه هامه..

 فرجانى00 خير..

     بدار00 خير انشاء الله..

 فرجانى00 وكالات انباء صحافه وسائل اعلام مرئيه وسائل اعلام

                مسموعه .. وسائل اعلام اليكترونيه..

     بدار00 انا عارف انك موسوعه اعلاميه .. بس تشرب حاجه الاول..

 فرجانى00 ملوش لزوم دا واجب عليّ..

      بدار00 لاء مش ممكن ..هه عايز تشرب ايه حلبه حصى شاى جنزبيل ..

 فرجانى00 يبقى جنزبيل وبالشطه..

     بدار00 (ينادى الجرسون) يابسه انت يابسه..

     بسه00 ايوه جاى..

     بدار00 هات لنا اتنين جنزبيل هنا قوام..

      بسه00 حاضر.. وعندك اتنين جنزبيل وصلحه..

 فرجانى00 ماقولتليش ايه الحكايه..

     بدار00 الحكايه انى اشتغلت فى الاونه الاخيره سمسار.. وسمسار لعيبه

               على مستوى عالى.. وكمان جبت من مورتانيا لاعب لفريق النخيل

                اسمه مامادو شاكر..

 فرجانى00 اللى حط الجون فى فى فريق الاحلام الماتش اللى فات..

     بدار00 تمام.. ومش كده وبس انا اكتشفت لاعب اسمه موكشه فى نفس الفريق..

      بسه00 الجنزبيل..

     بدار00 شكرا..

     بسه00 ايوه جاى..

 فرجانى00 انا مش مصدق معقول تبقى سمسار لعيبه ومكتشف النجوم

                وانا معرفش.. ايه اللى بجرى ازاى وانا واكل شارب نايم فى

                وكالات الانباء..

     بدار00 علشان كده انا جايلك النهارده تعملى روبرتاج خطير فى الصحافه

               علشان الدعايه..

فرجانى00 دا مش روبورتاج وبس دا انا هاخلى الاذاعه والتليفزيون يصتدافوك

               كمان لو انت عايز.. بس المهم تحكيلى عن كل حاجه بالتفصيل..

     بدار00 طيب اشرب الجنزبيل اشرب.. واسمع منى موجز الانباء..

                                        - موسيقى-

 م/4

 فرجانى00 ياه كل ده حصلك..

     بدار00 ايوه ولسه.. انا بدار سمسار فايف ستار هخلى الكبير والصغير

               يلعبوا كوره.. وكل واحد هياخد فرصته بدون محسوبيه

               ولا كوسه .. الموهوب هو اللى هيطرق بابه الشهره والمجد ..

               (صوت رنة محمول)

               ( من الافضل نص النغمه تقول : يابدار يا اوبهه ايه العظمه دى كلها)

     بدار00 لحظه ارد.. الوه ايوه انا .. ايه .. قناة البيبى اكس.. حاضر حاضر ..

                فى الوقت المحدد انشاء الله هكون عندكم.. مع السلامه..

 فرجانى00 فيه ايه..

     بدار00 الخير على قدوم الواردين ..قناة البيبى اكس عايزه تسجل معايا..

                                   - موسيقى-

                               (نهاية الحلقة 11)

                  (الحلقة الثانية عشرة)

م/1

              (صوت زغروده)

 ظريفه00 يا الف نهار ابيض يا الف نهار مبروك.. انا اول ماشوفت بسم النبى

              حارسه سى بدار منور على الشاشه .. جيت قوام ابارك واهنى..

 مستكه00 فيكى الخير ياست ظريفه..

 ظريفه00 اهيه دا حنا جران ونفرح لبعضنا .. وسى بدار خير مايمثلنا قدام الفيفا..

 مستكه00 هو انتى غريبه مانتى مننا.. اللى يفرحك يفرحنا واللى يزعلك يزعلنا..

 ظريف00 يارب كده يبقى فى اعلا المناصب يبقى سمسار درجه اولى..

              زى اللى بشوفهم بيجوا فى التليفزيون ويعملولهم شنه ورنه..

 مستكه00 تسلمى ياست ظريفه ياختى..

 ظريفه00 شوفى بقى ياست مستكه.. انتى زى اختى ومش هانكسف لما

              اقولك كلمتين..

 مستكه00 اهيه طبعا.. اتكلمى ياختى وخدى باراحك..قدامك الساحه واسعه..

 ظريفه00 انتوا دلوقتى العين بقت عليكم واتنقلتم نقله جديده يعنى اتنقلتم عالميا ..

              ايه رايك بقى تخدلكم شقه واسعه و برحه وشرحه احسن من دى..

              علشان الوجاهه..

 مستكه00 مش نستنى لحد ماناخد قرشين من شغل بدار فى السمسره ياست ظريفه..

 ظريفه00 اهيه والمبلغ اللى خدتوه من صفقة اللاعب مامادو ..

 مستكه00 الله انتى عارفه..

 ظريفه00 اهيه طبعا .. وهل يخفى الخبر.. دا كان زمان وجبر.. واللى شافوكم

              نشروا الخبر..

                                                 - موسيقى-

م/2

مستكه00 سمعت ادى النئ كتر يابدار واشتغل من قبل ماتعمل حاجه..

   بدار00 ميهمكيش خلى اللى يقول يقول ..ماهو لازم يحصل كده .. انتى

             متعرفيش من بعد ماطلعت فى التليفزيون وطلعت صورتى فى

             الجرايد هيحصل كده..

مستكه00 طيب والشقه هنعمل فيها ايه..

   بدار00 هنشوف احسن منها بس بعد الصفقة  الجايه.

مستكه00 وهو فيه صفقه جايه..

   بدار00 امال ..انا داخل على صفقه انما ايه هتخلينا نعيش فى المهندسين

             او الزمالك نفسها..

مستكه00 طيب وايه هتعمله فى الصفقه دى هتجيبه برضه من مركز الشباب

             ولا هتنقب عليه وسط الموهبين فى ربوع مصر..

    بدار00 لا لا هو صحيح اللاعب الاجنبى من الصعب اجيبه دلوقتى ..

               بس اليومين دول النوادى بتبيع لاعيبه وتشترى لاعيبه..

  مستكه00 ليه همه هيجددوم من اول وجديد..

    بدار00 ايوه  يامستكه .. اصل اليومين دول موسم انتقالات اللاعيبه..

 مستكه00  وهاتعمل ايه كده..

    بدار00 اسمعى .. انا من الدقيقه دى مش هسيب ولا نادى..هاعسكر فيه  

              واللاعب اللى هيبعوه هالقفه واكون مربط مع نادى يشتريه..

 مستكه00 وانا عملتك لك اللسته بحصر النوادى اللى بتلعب فى الممتاز (ب) كلهم..

    بدار00 طيب واعمليلى كمان حصر لفرق الدورى العام..

 مستكه00 اهيه مش كفايه الممتاز (ب) دا شغله لوحده عايزله تفرغ..

    بدار00 مانى عارف .. علشان كده اذا اضطريت لذلك ..لو اقتضى الامر

              يامستكه..

                                           - موسيقى-

م/3

             (صوت زغروده)..

 مستكه00 حصل ايه ياست ظريفه..

 ظريفه00 حصل خير.. شوفتى مابدخلش عليكم الا بالافراح..

 مستكه00 الهى يجعل حياتك كلها افراح..

 ظريفه00 انا جيبالك مفاجأه ..

 مستكه00 مفاجأه ..

 ظريفه00 ايوه ..لقيت لك شقه انما ايه .. من اللى قلبك يحبها..

 مستكه00 شقة ايه..

 ظريفه00 اصل انا ليا معارف ستات كتير.. واحنا قاعدين نكلم عن هذا

              وذاك .. قاعدة نميمه يعنى .. قمت عرفت من واحده منهم انها

              هتسيب البلد هى وجوزها وهيسافروا.. قلت لها والشقه هتعملوا

               فيها ايه.. قالت لى هنبيعها..

 مستكه00 (باشتياقه) هه وبعدين..

 ظريفه00 وبعدين قلت لها اوعى تصرفى فيها قبل ما اشوف رغبة حبيبتى

               وجارتى مستكه.. قولت ايه..

 مستكه00 مش عارفه والنبى ياختى..

 ظريفه00 اهيه متتردديش اصلها واسعه زى ستاد القاهره.. ودى عايزه

              العائله الرياضيه.. يرمحوا فيا زى الخيل..

 مستكه00 خلاص استنى عليا بس لحد مايرجع بدار من مهمته الرسميه

              واعرض عليه الامر وافق ناخدها ..رفض يبقى هارد لك فى

              المره الجايه.. والجايات ياختى اكتر من الريحات..

                                              - موسيقى-

                                         

م/4

     بدار00 شقة ايه اللى بتقولى عليها يامستكه.. وانا داخل على منعطف تاريخى

               من حياتى فى عالم السماسره..

  مستكه00 يعنى ايه الكلام ده بقى..

    بدار00 يعنى خلاص ..انا الاول اخلص من اللى فى ايدى..واذا حصل

              الموضوع ده هجيب لك قصر او فيلا ع البحر فى مارينا..

 مستكه00 مش عايزه قصر ولا فيلا بس نشوف الشقه دى..

    بدار00 طيب لما اخلص من الموضوع ده الاول احسن ده موسم السماسره ..

               وانا طبعا عايز اثبت انى جدير بالشغلانه دى قدام الانديه..

               ده قبل مايزبقنى حد وياكل التورته لوحده.. اروح انا فى خبر

               كان .. فهمتى يامستكه..

 مستكه00 والله مانى فاهمه حاجه..

    بدار00 واعملى حسابك يمكن ادخل اجتماع مغلق فى غضون ساعات..

                                             - موسيقى-

                                          (نهاية الحلقة 12)  

          

                  (الحلقة الثالثة عشرة)

م/1

  مستكه00 يعنى ناوى تسافر برضه اسوان يابدار..

    بدار00 اعمل ايه يامستكه.. دى فرصتى.. والفرصه لما تآتى ..تلاقى فى

              الحر جيلاتى..مش كده ولا ايه..

 مستكه00 بس انت عمرك ماسافرت هنا ولاهنا فى حياتك.. انت اخرك شبرا ..

   بدار00 خلاص مانى جمدت قلبى وهسافر .. صفقة اللاعب اللى هجيبه من اسوان

              دى كبيرة قوى ..ميعملهاش الا اللى حظه صاعد.. وكمان انا مش

              هقعد كتير ..مسافة السكه بس..

 مستكه00 واطمن عليك ازاى..

    بدار00 عن طريق الفيسبوك.. تدينى ماسج ارد عليكى على طول.. وهى

              انسب وسيلة اتصال بنا.. وان كان هيقف قدامك حاجه عندك

              ظريفه جارتك.. اهى خبيره فى النت..

 مستكه00 طيب وهاتسافر امته..

    بدار00 فى طيارة بكرة انشاء الله..

 مستكه00 بس انا كنت عايزاك تشترى لك محمول اهو برضه لو عايزه اتصل

              بك اتصل على طول..

   بدار00 انا ناوى اعمل كده برضه .. محمول فى اليد ولا الف نت ع الارض.

                                            - موسيقى-

 م/2

 ظريفه00 بقى ده اللى مزعلك ياست مستكه..

 مستكه00 اللى مزعلنى انه اول مره يسافر اسوان.. وسافريه مفاجأه..

 ظريفه00 دا انتى الاصول تفرحى.. سى بدار رايح يخلص صفقة لاعب

              للمنتخب تحت 18سنه بنفسه..

 مستكه00 ياريتهم كانوا خدوه من اى نادى من اجوارنا وخلاص..

 ظريفه00 لاء ملكيش حق المفروض تفرحى علشان الحدث السعيد اللى

              هينتظر جوزك بعد مايجيب اللاعب فى ايده ويتنه جاى.. وكمان

              اسوان مش بعيد.. اهيه دا التكنولوجيا خلت احنا والعالم قريه واحده ..

               مش هتخلينا احنا واسوان زى النجع.

                                            - مويسقى-

م/3

              (صوت طائره)

   بدار00  والله وبيضالك فى القفص يابدار.. اول مره تركب طياره.. فينك يامستكه

               تشوفى الامله اللى انا فيها..

              (صوت مذيع المطار)

المذيع00  ركاب الرحله المتجهه الى اسوان يتوجهون الى صالة الركاب..

  بدار00 وجيت  لحظة الحسم .. الى الطياره..

                                           - موسيقى-

م/4

مستكه00 لاء مش قادره اصطبر اكتر من كده.. ايوه..

ظريفه00 مالك بس ياست مستكه..عماله تلفى حولين نفسك ليه..

مستكه00 عاوزه اتصل ببدار..

ظريفه00 اهيه هو لسه وصل.. دا لسه زمانه فى الطياره..

مستكه00 وانا عاوزه اتصل به..

ظريفه00 طيب استنى لحد مايروح المكان اللى هو رايحه ويفتح الموقع

             نعرف نكلمه..

مستكه00 مش هقدر لسه استنى..

ظريفه00 باقولك ايه فى حل حلو قوى..

مستكه00 الحقينى به..

ظريفه00 انا هخليكى تكلميه من عن طريق الموبايل بتاعى داهوه..

مستكه00 بس ممعهوش موبايل..

ظريفه00 مانى هاقولك.. احنا نتصل بالمطار.. ونقولهم على اسمه واسم الطياره

             اللى مسافر عليها يقوموا يوصلونا به.. ايه رايك..

مستكه00 ودى فيها راى يلا يلا .. اتصلى ياست ظريفه..

                                     - موسيقى-

م/5

                      (صوت طائره)

كابتن الطائره00 الكابتن بدار ابو عمار يحضر لكابينة الطياره..

           بدار00 نعم يا كابتن..الله همه عرفوا اسمى ولا ايه..

   ك/ الطائره00 كلم جماعتك مستكه..

           بدار00 مستكه!! (صوت قريب) الو ايوه يامسكه..

        مستكه00 (ص/بعيد) بدار انت فين يابدار..

           بدار00 (ص/قريب) انا فى الطياره.. حصل حاجه..

        مستكه00 (ص/بعيد) بطمن عليك..

           بدار00 (ص/قريب) اطمنى خالص من ناحيتى .. انا زى مايكون فى

                     رحله ترفيهيه يامستكه.. انا شايف كل حاجه من اعلى 350الف

                       قدم ..

        مستكه00 (ص/بعيد) طيب اوعى حد يديك حاجه وتشربها..

           بدار00 (ص/قريب) حاضر..

        مستكه00 ( ص/بعيد) ولا تبص لحد كده ولا كده..

           بدار00 (ص/قريب) انتى مش لسه محفظانى الكلام ده فى وصية السفر..

        مستكه00 (ص/بعيد) ايوه .. بس ده تذكره.. وكمان الاعاده افاده..    

               واول ماتروح وتوصل بالسلامه على طول افتح الموقع

               علشان اكلمك..

    بدار00 (ص/قريب) طيب يلا يلا خلى الناس تشوف شغلها احسن نلاقى

                مسار الطياره انحرف ورحنا على الواحات..  

                                           - موسيقى-

   م/6

 ظريفه00 انبسطى بقى اديكى كلمتيه وهو فى الهوى..

 مستكه00 مش عارفه اقولك ايه ياست ظريفه..

 ظريفه00 ماتقوليش حاجه .. الجران لبعضها برضه..

 مستكه00 لولا فكرتك دى ماكنت كلمته..

             (جرس باب) دقيقه واحده اشوف مين..

             (صوت طرق اقدام) (صوت فتح باب)

  رجل00 ده شقة الكابتن بدار السمسار..

مستكه00 ايوه هى..

  رجل00 طيب الكابتن حنفى باعت له الشنطه دى..

مستكه00 طيب شكرا..هات  .. (صوت غلق باب)

 ظريفه00 خير ياست مستكه..

 مستكه00 هه لاء مفيش خير خير ياختى ..

 ظريفه00 شنطة ايه دى..

 مستكه00 لاء ولا حاجه..دا خاصه ببدار..

 ظريفه00 طيب ممكن تجبيلى شوية مايه..

 مستكه00 حاضر.. (صوت طرق اقدام تتباعد)

 ظريفه00 (لنفسها بصوت خافت) اما افتح الشنطه دى انا حاسه ان فيها

               حاجه مريبه (صوت فتح حقيبه) ايه الفلوس دى كلها..

                                      - موسيقى-                                  

                                   (نهاية الحلقة 13)

                  (الحلقة الرابعة عشرة)

م/1

              (صوت طرق اقدام تتقارب)

 مستكه00 دا مش فلوسنا.. دا دى جايه للاعب هيوصلهاله بدار..

 ظريفه00 معلش ياختى انى فتحت الشنطه من غير ما اقولك..

 مستكه00 بس كنتى قوليلى وكنت هاقولك ايه اللى فيها..

 ظريفه00 اهيه يقطعنى .. اصل ان مريضه بحب الاستطلاع.. حصل خير..

 مستكه00 اصل بدار مابيحبش يخلى ولا لاعب يكون ناقصه حاجه.. اللى له

               حاجه او بينه وبين ناديه مشكله يقوم يحلهاله..

 ظريفه00 ماهوباين ..علشان كده اتشهر بضربة حظ..

 مستكه00 شوفى هو مؤمن ان حياته ضربة جزاء..

 ظريفه00 يعنى ايه..

 مستكه00 يعنى كأنه بيشوط فى الجون وهو مغمض ..جيت الكوره فى الجون

              يبقى الحظ مبتسم له ..ولو طلعت الكوره بره.. يبقى الحظ بيعنده

              وتبقى حياته اوت..

 ظريف00 ربنا يكرمه دايما سى بدار.. ويخلى حياته اهداف على طول..

                                        - موسيقى-

م/2

بدار00 (لنفسه) ايوه كده بقى نفتح النت وندخل الايميل..

          (صوت حركة مفاتيح) كل حاجه ظهرت اهيه.. اما ابعت لمستكه

          رساله.. زوجتى العزيزه وصلت بالسلامه لاسوان وانا قبلت

          المدرب العام لفريق ابو مخيمر لكرة القدم بالموافقه علي بيع اللاعب

          ابوفجله ..

          وقررنا خلاص لكتابة العقد.. ايه اخبارك واخر التطورات فى

          الملاعب ..لانى عارف الدورى العام بيلعب فى الاسبوع 18..

                                         - موسيقى-

م/3

مستكه00 افتحى بقى يلا يا ام ظريف قوام النت..

 ظريفه00 اهوه بس بيحمل.. ادى الرسايل اهيه.. الحقى الحقى..

 مستكه00 فيه ايه..

 ظريفه00 جالك رساله من سى بدار..

 مستكه00 طيب اقريها قوام..

 ظريفه00 حاضر.. بيعرفك انه وصل بالسلامه لاسوان.

 مستكه00 بيقول ايه تانى..

 ظريفه00 وعاوز يعرف اخبار الدورى ومايحدث على الساحره المستديره..

 مستكه00 انا عملاله تقرير مفصل..

 ظريفه00 خلاص يبقى لازم ترد له الرساله..

                                      - موسيقى-  

م/4                                    

 هنومه00 مين اللى قالك اننا هنفرط فى فى اللاعب ابوفجله.. هه انا كابتن

             هنومه عضو مجلس ادارة نادى ابومخيمر وليا الحق فى الاعتراض

             او الموافق..

   بدار00 طيب ياكابتن اعلنتم على انتقال اللاعب..

هنومه00 ورجعنا فى كلامنا..

  بدار00 ازاى .. هو ايه عندكم تصريحاتكم كده بدون دراسه .. متعرفوش ان

            واحد زيي لما يشم خبر هيجى على ملا وشه.. هوا انا جاى من

             قويسنا للقاهره ..ده مسافه تقدر باميال ياهانم..

هنومه00 شوف بقى تقدر باميال او باحمال مليش دعوه.. لن نفرط فى ابو فجله

            يعنى لن نفرط فى ابوفجله..

 بدار00 وانا بقى مش هارجع مصر الا وفى ايدى ابوفجله.. يامدام هنومه..                                    

                                   - موسيقى-          

م/5     

 ظريفه00 انا قصداكى فى خدمه ياست مستكه..

 مستكه00 خدمه.. اؤمورى طلبك يجاب على طول.. هو انا اخدم اعز منك..

              دا انتى وقفتى جنبى لحد ماتعلمت الفيسبوك ده..

 ظريفه00 متقوليش كده ..الناس لبعضها..

 مستكه00 على الاقل ارد الجميل..

 ظريفه00 بقى ابنى ظريف متشعلق يلعب كوره.. وياختى سمع ان فيه مدارس

               كوره  من هنا على طول عايز ينضم ليها..

 مستكه00 اهيه وهو فيه مدارس كوره..

 ظريفه00 ايوه.. دابقت منتشره قوى.. وفيه اكاديميات كمان..

 مستكه00 خلاص اول مايرجع بدار هقوله.. واخليه يضم لك ظريف

              ابنك مستوى اول..

 ظريفه00 تشكرى دا ظريف هيفرح قوى.. لما يعرف بالخبر ده..

 مستكه00 هه مش هنكلم بدار بقى على الماسنجر..

 ظريفه00 نكلمه ياختى نكلمه.. نفتح الكمبيوتر..

 مستكه00 فتحته اهوه..

 ظريفه00 اكتبى بعد السلام والتحيه نعرفكم بسير الدورى العام هذا الاسبوع..

               الحصيله الاوليه 9 اصابات و3طرد بكارت احمر و17انذاروالنتايج ..

               فريق النخيل يهزم الفرافير 2/صفر.. وفريق الزعيم يتعادل مع

               فريق الاحلام صفر/صفر.. ومن المنتظر هبوط  فريق الشاكوش

               والوادى الغربى .. عايزه كمان اشغلك الكاميرا ..         

               دى علشان  تشوفيه  وهو يشوفك..

  مستكه00 معقول.. يعنى يشوفنى واشوفه.. كده زى انا وانتى..

  ظريفه00 امال التكنولوجيا ماخلتش حاجه.. والتطور الرهيب قربنا لبعضنا

               زى ما قولت لك..  ادينى شغلتهالك كمان..

  مستكه00 (بفرحه) بدار اهوه..

  ظريفه00 استنى علشان تكلميه لازم تحطى السماعه دى فى ودنك.. ايوه

               ركبيها كده.. ودى قدامك كده تكلمى فيها..

  مستكه00 اكلمه بقى..

  ظريفه00 طبعا كأنكم دلوقتى وجها لوجه.. face to face)) فيس تو فيس.

  مستكه00 استنى استنى ياست ظريفه..

               (بخضه) ايه ده..ايه اللى انا شيفاه ده..

  ظريفه00 مالك فيه ايه..

  مستكه00 شوفتى اللى واقفه جنبه دى ..

  ظريفه00 ايوه شيفاها..

  مستكه00 بدار جنبه واحده ست ..

                                              - موسيقى-

                                      (نهاية الحلقة14)

                    (الحلقة الخامسة عشرة)

م/1

 ظريفه00 ماتخضيش الراجل كده على مشامه ياست مستكه.. يمكن يطلع مظلوم..

 مستكه00 مظلوم واللى شفته ده ..مش حقيقه..

 ظريفه00 انا معاكى.. بس يمكن تطلع زميلته فى السمسره وبيعملوا شغل

              ويا بعض ..فيفتى فيفتى يعنى..

 مستكه00 انا شفت بعينى محدش قالى.. والصوره مابتكدبش..

 ظريفه00 هو راجع النهارده.. اما يوصل اعرفى منه الحكايه ..ويبقى بعد كده

              تاخدى منه موقف..

 مستكه00 اما اشوف.. بس مايكنش متجوزها..

 ظريفه00 لاءلاء ملكيش حق.. الكلام ده ماتقلهوش ..انتى مش عارفه ان

              سى بدار اصبح من المشاهير ومعروف فى الاوساط الرياضيه ..

              واى كلمه ممكن وسائل الاعلام تعمل منها حكايه خصوصا

              الجرايد الصفره.. والقنوات الفضائيه اللى مورهاش الا القيل والقال..

                                          - موسيقى-

م/2

هنومه00 مجلس الاداره ميقدرش يقرر حاجه انا مش موافقه عليها..

   بدار00 ازاى ياكابتن هنومه ..النادى شايف ان من الافضل يبيع ابوفجله ..          

هنومه00 على جثتى.. داهو اللى نجدنا فى الهاف تيم الاخير بعد ابوسكه كان

             هياخد الكاس.. نزل حط جونين وحصلنا عليه اخيرا.. نقوم نفرط فيه

             كده بسهوله..دا برضه ماتجيش..

   بدار00 ماهو كل نادى لازم يجدد اللى عنده كل سنه..

 هنومه00 يعنى ايه .. يعنى على راى المثل ..ناكله لحم ونرميه عضم.. لاء..

   بدار00 طيب المفاجاه بقى انى خلاص خدت موافقه بالاستغناء عن اللاعب..

هنومه00 اهيه ازاى..

   بدار00 ادى العقد اهوه..

هنومه00 ورينى.. اى صحيح.. (بتراجع) خلاص مقدرش اقول حاجه

              عنه.. الطوفان جاى من فوق..

  بدار00 صدقتى..

هنومه00 ايوه بس اسمع لازم تجيب بديل لابوفجله..

   بدار00 مانى محضر لك مفاجأه..

هنومه00 مفاجأة ايه دى..

  بدار00 جايب لكم صفقة اللاعب حبلص ..

                                   - موسيقى-

م/3

    بدار00 دا كانت سايحه من بلاد بره يامستكه..

 مستكه00 سايحه.. وايه اللى وقفها جانبك..

    بدار00 كانت عايزه تكلم اهلها زى ماكلمتك.. والسياح دول لازم نكرمهم ..

              انت مش لما بيجى سايح هنا فى مصر ويشوف الاهرامات مش

               بيركب الجمل..

 مستكه00 ايوه..

    بدار00 ومش بينفع صاحب الجمل..

 مستكه00 ايوه..

    بدار00 ولما تتمشى على الكورنيش مش بتاكل ترمس ودره مشوى ولا لاء..

 مستكه00 برضه ايوه..

    بدار00 وفى كل الحالات بتدى لكل دول فلوس..

 مستكه00 طبعا..

    بدار00 وكل ده مش اقتصاد لبلدنا ..مش نشجع السياحه بقى ولا لاء..

                                     - موسيقى-

م/4

    بدار00 ابوفجله اللى جبته ده كانت صفقه سهله .. نقلته من نادى لنادى..

 مستكه00 ايوه بس انا بقى عندى تفكير تانى فى دماغى ..

    بدار00 تفكير ايه..

 مستكه00 ايه رايك لو عملنا مدرسة كوره..

    بدار00 مدرسة كوره..

 مستكه00 ايوه.. مدرسه نفرخ منها اللاعيبه ونسمنهم ونبعهم للنوادى والفرق..

    بدار00 مدرسه..

 مستكه00 ايوه مدرسه.. او اكاديميه..

    بدار00 بس الموضوع ده عايز تفكير يامستكه..

 مستكه00 تفكير ايه ولا تفكير ولا حاجه..

    بدار00 لاء لاء لاء ..مدرسة ايه بس يا مستكه..

 مستكه00 الله  دا احسن عمل نعمله ..

    بدار00 ايوه بس..

 مستكه00  بس ايه..

    بدار00 المدرسه عايزا لها مكان واسع ..

 مستكه00 موجود..

    بدار00 موجود.. موجود ازاى واحنا ما عندناش الا الشقه دى..

 مستكه00 اسمع احنا هنأجر حتة جابر ابو زيد الواسعه..

    بدار00 جابر جوز اختك..

 مستكه00 ايوه كبيره وحلوه ويرمح فيا الخيال

    بدار00 دا هياخد فيها مبلغ كبير..

 مستكه00 لاء ماتخفش هخليه يريحنا فى ايجارها.. وان كان على الفلوس موجوده..

    بدار00 ازاى ولسه مخدش الفلوس الباقيه من حنفى مدير كرة نادى النخيل..

 مستكه00 لاء ماهو بعتهم..

    بدار00 صحيح طيب ماقولتيش ليه قبل ماكنت هاروح اطالبه بهم..

 مستكه00 كنت هاقولك بس ماجيتش فرصه..

    بدار00 طيب بقى مين اللى هيدرس لهم ويدربهم ..

 مستكه00 اليومين دول بقى فيه كتب طالعه عن اللعب .. يعنى فى الكوره تلاقى

              فى السباحه تلاقى فى الحكشه برضه تلاقى.. واللى هيدرس لهم ..

              فيه ياما شباب بيدور على شغل ومعاهم كليات تربيه رياضيه..

    بدار00 يعنى كده سهلتيها..

 مستكه00 ايوه لان مفيش حاجه مستحيله .. الانسان فى ايده يطلع من التراب

              دهب.. بس بقى الكسل سيد الموقف..

    بدار00 هه وهتعرفى ازاى تنشأيها..

 مستكه00 طبعا انا هاكتب ع النت كيف تنشأ مدرسة كوره ..هلاقى الرد فورا..

                                      - موسيقى-

                               (نهاية الحلقة 15)