الخميس، 15 أغسطس 2019

مسلسل سمسار فايف ستار ح 16-20

                           (الحلقة السادسة عشرة)

م/1
مستكه00 لسه مزمزء من حكاية المدرسه دى يابدار..
   بدار00 اصل الحكايه دى لازم لها دراسة جدوه يامستكه.. ويكون الواحد فاهمها..
مستكه00 شوف ياخويا لا دراسة جدوه ولادراسة  جدول.. احنا هانعملها بالبركه..
              واللى عايز يتقدم لها مقابل اشتراك رمزى..
   بدار00 ومش دى برضه هتعوز متطلبات ..
مستكه00 متطلبات ايه يعنى..
  بدار00 معدات ملابس رياضيه.. وجبات غذائيه حاجات من دى يعنى..
 مستكه00 بسيطه هخلى الست ام راغب تفصل لكل واحد منهم طقم فنيلات
             وشورتات وكاب كمان علشان الحر.. وان كان على الوجبه الغذائيه..
             مش هغلب كل يوم الصبح اقوم بدرى اجيب لكل واحد من عند الست
             سنيه اللى على الناصيه  رغيفين وبنص طعميه..
   بدار00 كده اهوه حلتيها..
مستكه00 كل حاجه سهله بس متعقدهاش انت بس..وقول يا باسط..                                            
                                      - موسيقى-
م/2
مستكه00 اتفضل ياسيدى..
   بدار00 ايه ده..
مستكه00 ده كل المكتوب على النت بخصوص المدرسه الكرويه..
   بدار00 دا حاجات سهله خالص..
مستكه00 امال مش قولت لك.. المهم العزيمه.. وبدل ما العيال بتلعب فى الشارع
              فى اجازة المدرسه نلمهم ونقدم لهم حاجه مفيده..
   بدار00 المهم يامستكه متاثرش على شغلى ..
مستكه00 لاء لاء انا اللى هاديرها خليك انت فى السمسره وانا فى المدرسه ..
             واذا لزم الامر تبقى اشراف عام..
   بدار00 خلاص وانا علشان اطمن هاسال صاحب الخبرة..
مستكه00 وماله ..برضه ما خاب من استشار..
                                         - موسيقى-
م/3
    بدار00 مصممه على المشروع ده برضه يامستكه..
 مستكه00 بصراحه اى..
   بدار00 بس كنت باقول خلينا فى السمسره دى وخلاص.. وسبى العيش
             لخبازه حتى ولو كلوا نصه..
  مستكه00 انا خبازه.. اهيه مش وافقت انى ابقى من العائله الرياضيه..
    بدار00 ايوه..
 مستكه00 طيب خلاص والمشروع ده دخل ناخشيشى وعمر دماغى قوى..
              خصوصا لما لقيت عيال الناحيه عمالين يلعبوا فى الشارع زى ماقولت
              لك والى يشوط الكوره ويكسر ازاز الشباك ولا اللى يشوط فى حد
              ماشى .. ودول بقى تفرخ منهم زى ما انت عايز وتورد للنوادى..
              ومش هتلاحق..
   بدار00 ماشى يامستكه زى ما انتى عايزه.. انا هوافق بالثلث لحد ما
              اشوف النتيجه..
                                        - موسيقى-
م/4
مستكه00 اهو ربنا سهل واجرنا المكان..
   بدار00 مكان ينفع برضه..
مستكه00 فى الاوضه دى بقى هتبقى الاداره.. والاوضه اللى جنبها
             دى هتبقى اوضة تغير الملابس..
   بدار00 والتالته دى مخزن..
مستكه00 لاء مخزن ايه ..لاء دانا هاعملها اوضه عليها الايمه فيها سرير
             وتليفزيون ودش .علشان تبقى استراحه وكمان النزلاء..
   بدار00 نزلاء..
مستكه00 ايوه افرض ان فيه طلبه هتيجى من منطقه بعيده.. مش هتحب تبات هنا..
   بدار00 ايه يامستكه هو احنا فى الجامعه عاملهم مدينه جامعيه..
مستكه00 ماهو لازم كده فى اى مدرسه استثماريه .. باقولك ايه نرجع
              بقى لموضوعنا .. الحوش الكبير ده يلعبوا ويتمرنوا فيه..
              وفى الجنب الصغير ده يبقى فيه حتة كشك نبيع لهم شوية
              خردوات.. يعنى شوية بسكويت على عسليه على بونبونى وكمان
              معاهم شاى بحليب..
   بدار00 كشك هتعملى كشك هنا يامستكه..
مستكه00 طبعا.. امال على الاقل علشان ميشتروش من بره.. زى النوادى
             الكبيره مابتعمل.. وممكن نبقى ناجره بالمزاد وكتير مايتقدم ..
   بدار00 طيب واجرتى كل ده بكام..
مستكه00 بملاليم.. ب250الف بس فى الشهر..
   بدار00 يا بلاش..
 مستكه00 شوفت بقى اد ايه اختى وجوزها مظاليم..
                                       - موسيقى-

م/2
    بدار00 فيه حد يأجر مكان زى ده ب250الف جنيه فى الشهر ليه
              هو مال سايب..
 مستكه00 اهيه 250 الف دا انا غلط معلش.. وانا اللى افتكرتك زعلت
              لما لفعتنى ومشيت..رغم انك قولتلى يابلاش..قولت تبقى عجباه..
   بدار00 ماهو طبعا رقم زى ده اصعقنى.. انا جيت فى دماغى الاول 250جنيه..
             افاجأ القيها 250الف جنيه..
مستكه00 معلش انا غلط فى الرقم دا همه 250جنيه بس..
   بدار00 ايوه كده تبقى مبلوعه ..
مستكه00 انا غلطانه.. ودلوقتى بقى ايه رايك فى الموضوع  اللى بداناه ده..
   بدار00 مش بطال بس بقى عايزك تعملى اعلان وتحددى شرط فيه..
مستكه00 شرط.. ايه هو الشرط ده..
   بدار00 اللى يدخل المدرسه يكون موهوب من الدرجه الاولى.. علشان يوفر
             عليا عناء البحث عن لاعيبه..
مستكه00 طبعا ليك عليا هاعمل اعلان على الفيسبوك وقدام المدرسه وهاطبع
             ورق وافرقه كمان.. بس فيه حاجه اخيره.. هنسميها ايه..
  بدار00 الاسم ده سبينى افكر فيه علشان نجيب اسم يشد شويه..وكمان
            عايزك يامستكه فى المدخل تحطى صوره كبيره لمامادو ولموكشه
             وابوفجله..
مستكه00 ليه كل ده..
  بدار00 مش دول اللى اكتشفتهم .. وهمه دول فتحة الخير عليا..
                                     - موسيقى-
                                    

                              (نهاية الحلقة 16)


                  (الحلقة السابعة عشرة)

م/1
 ظريفه00 يالف نهار ابيض يا الف نهار مبروك ..عملتوا مدرسه كوره..
 مستكه00 ايوه ياست ظريفه.. عملناها ودلوقتى ماشين فى الدعايه والاعلان..
 ظريفه00 طيب قوليلى كنت ساعدتكم..
 مستكه00 اصل كان لسه كلامنا كله كان فى حيز التنفيذ..
 ظريفه00 خلاص اول واحد يدخلها ابنى ظريف..علشان اما يمر
              عليها 100 سنه وتعملولها المئويه يقولوا ان ظريف اول من دخالها..
              واسمه يتحط فى لوحة الشرف..
 مستكه00 بس شرط فيها انه يكون موهوب..
 ظريفه00 الا موهوب دا ظريف ابنى احسن واحد يحط الكوره فى المقص..
 مستكه00 خلاص يجى ويقدم نفسه..
 ظريفه00 ولو فيها رزاله يعنى.. هيبقى لهم امتيازات..
 مستكه00 طبعا امتيازات واجازات ووجبات وكل حاجه..
 ظريفه00 ايوه كده خير مافكرتم.. سيروا على بركة الله..
                                      - موسيقى-
م/2
مستكه00 هه اخترت اسم ايه بقى للمدرسه يابدار..
   بدار00 اخترت اسم.. مدرسة مستكو للالعاب الرياضيه..
مستكه00 لاء انا مش عايزها باسمى.. انا حياالله مديرة اعمالك وبسلى وقتى..
             انما انت صاحب المدرسه..الوجهه قدام الاوساط الرياضيه..امال..
   بدار00 وهو فيه فرق بينا يامستكه..
مستكه00 مفيش بس المدرسه لماتنكتب باسم الراجل احسن من اسم الست
              برضه مش كده ولا ايه..
   بدار00 طيب وهتختارى اسم ايه..
مستكه00 هاختار اسم حلو قوى .. هايكون اسمها مدرسة  كابتن بداركو 
             مكتشف مواهبكو..
                                    - موسيقى-
م/3
  ظريفه00 خدى يا مستكه ياختى دى قايمه فيها اتناشر تلميذ عايزين يلتحقوا
               فى المدرسه..
 مستكه00 اهيه وجبتى العدد ده منين ياست ظريفه..
 ظريفه00 مش انا اللى جايباهم.. دا ابنى ظريف.. اول ما قال لزمايله وحكى
              لهم عن المدرسه كلهم رغبوا فى الالتحاء بها .        
  مستكه00 ياسلام دا شاطر قوى..
 ظريفه00 دا يعجبك خالص..
 مستكه00 خلاص يعفى من الاشتراك..
 ظريفه00 الله يخليكى.. وهاخليه يجيب اكتر من كده .. ابنى ظريف حايز
              على ميداليا من مسابقة الجرى مسافة 100مترمن المدرسه اللى
              هو فيها..
  مستكه00 دا على كده بقى نابغه وموهوب..
  ظريفه00 الا نابغه.. طيب اللى حببه فى الكوره الخطيب بيبو .. اصله واخده
               مثل اعلى فى الكوره.. ومالى اوضه كلها بصوره..
 مستكه00 كويس انه خده ادوه يام ظريف..
               (مقصوده بهذا النطق)
 ظريفه00 مانى كمان عماله اقوله ياظريف يابنى طريق الكوره صعب..
              اختار حاجه تانيه.. يقولى لاء.. بيبو بدأ من الصفر وكان بيلعب
               بكوره شراب.. وبقى نجم النجوم .
 مستكه00 ايوه صحيح.. عنده حق فى اللى بيقوله..
 ظريفه00 مانى قلت له كمان عايز تعمل راسك براس بيبو ياوله..فينك انت
              وفين بيبو .. ام قالى عاوز احزوا حزوه..
                                       - موسيقى-
م/4
مستكه00 باقولك ايه يابدار..
   بدار00 ايوه يامستكه..
مستكه00 عايزاك ياخويا تروح مديرية الشباب والرياضه بكره ..
   بدار00 ليه..
 مستكه00 تجيب للمدرسه تصريح احسن انا سمعت ان المدرسه قبل ماتشتغل
             لازم نرخصها..
    بدار00 متاكده من الكلام ده..
 مستكه00 انا سمعت بس ماعرفش حقيقه ولا لاء..
    بدار00 خلاص انا هافوت عليها اسال ولو لازم لها تصريح صحيح هاطلعه..
 مستكه00 ياريت تزلل لنا العقبه دى علشان نفتتح المدرسه.
                                   - موسيقى-
م/5
   مستكه00 كنت فين يا بدار..
      بدار00 كنت فى شغل.. اصل انا لقيت واحد زى مامادو اللى راح
                فريق النخيل مانتى عافاه .. وعايزيحترف..
    مستكه00 صحيح ..
      بدار00 ايوه زى مابقولك كده..
مستكه00 وده اسمر بقى زيه ولا..
   بدار00 لاء اشقر.. ابيض قوى..
 مستكه00 اهيه هو كل شغلك ابيض واسود..
   بدار00 الالوان جاى بعدين..
مستكه00 وهتخليه يحترف بقى فين المره دى..
   بدار00 هنقله من نادى لنادى واقول عليه برضه اجنبى..
مستكه00 طيب ممكن يعرفوه المره دى.. مش كان بيلعب فى نادى عارفينه..
   بدار00 ايوه..
مستكه00 طيب اكيد بقى شافوه وهوبيلعب.. ومش هتقدر يا حلو تطلع من
             المطب ده..
  بدار00 لاء ماتخفيش .. مانى هاعمله شوية مكياج وتوضيبات اخفى بهم
              ملامحه خالص ومخلوش يبان لاى حد انه شافه قبل كده..
              هو يعنى مامادو اتعرف  لحد دلوقتى..
مستكه00 لاء بس مامادو ما لعيبش فى الملاعب قبل كده علشان كده محدش
              واخد باله منه..كمان لونه الاسمر فيه اب عن جد..
   بدار00 وانا المره دى هستعمل فن المكياج.. واشوف انا بقى ولا فتاكتهم..

                                    - مويسقى-
        
                               (نهاية الحلقة 17)

                 (الحلقة الثامنة عشرة)
م/1
شكرى00 ايوه يافندى عايز حاجه..
    بدار00 عايز اطلع تصريح لمدرسة كوره..
 شكرى00 ايه ليه..
    بدار00 لاكتشاف الموهوبين..
شكرى00 انت بتهزر يا استاذ..
   بدار00 ليه قولت حاجه كده ولا كده..
شكرى00 طبعا.. انت رياضى ..نجم كوره.. من الاترس من رابطة
              مشجعى المنتخب..
   بدار00 لاء ولا دى ولا دى .
شكرى00 معاك عضوية نادى عريق ..
   بدار00 لاء..
شكرى00 طيب امال ايه..
   بدار00 انا بدار سمسار فايف ستار.. مكتشف الموهوبين..
شكرى00 ايه معقول طيب مش تقول كده يارجل ..
   بدار00 انت ادتنى فرصه..
شكرى00 معلش اللى ما يعرفك يجهلك.. انا بسمع عنك كتير.. ياسلام اقعد
             ياراجل اقعد عايز اكلمك فى حاجات بخصوص اللاعيبه..بس اخلص
             اللى فى ايدى ده وافضالك.. تشرب ايه شاى..
             (ينادى) ياواد ياشبانه هات شاى ..
   بدار00 مابشربش الشاى اشرب ازوزه..
شكرى00 هات ازوزه ياشبانه.. اقعد ياراجل اقعد..
                           - موسيقى-
 م/2
شكرى00 ادى التصريح ياسيدى.. هه مبسوط..
   بدار00 قوى..
شكرى00 اعمل المدرسه ولا يهمك اعمل ياراجل مش احسن ما الولاد يلعبوا
              فى الشارع ويضايقوا الماره..
   بدار00 انا ماكنتش موافق الاول.. وكنت معترض يا استاذ شكرى..
شكرى00 لالالاء مالكش حق .. تعترض على مشروع هايل بالشكل ده..
              طب انا بشجع الراجل الطموح اللى يفكر فى حاجه زى دى..
   بدار00 اصلها مش فكرتى..
شكرى00 امال فكرة مين لمؤخذه..
   بدار00 مستكه مراتى..
 شكرى00 تسمح لى اقولك .. مراتك دى نابغه .. ايوه كونها تفكر بالشكل ده
               تبقى نابغه.. يلا يلا اتكل على الله وروح انطلق بالمشروع مين
               عارف فى يوم من الايام تكبر وتبقى اكاديميه..
     بدار00 طيب سلام عليكم..
  شكرى00 وعليكم السلام ورحمة الله وبركاته.. (صوت طرق اقدام تتباعد)
               جتنا نيله فى حظنا الهباب .. ناس عندها اللى بتفكر فى مدرسه
               واكاديميه وناس عندها الى بتفكر فى الباميه والملوخيه..
                                        - موسيقى-
م/3
مستكه00 جبت التصريح..
 بدار00 ايوه..
 مستكه00 من الشباب والرياضه..
 بدار00 ايوه..
 مستكه00 وسجلت المدرسه ..
 بدار00 ايوه..
 مستكه00 فى الشهر العقارى..
 بدار00 ايوه..
 مستكه00 طيب يلا بينا عليها..
                                         - موسيقى-
م/4
مستكه00 19 طفل المتقدمين للمدرسه لحد دلوقتى.. عمر 7 ل14سنه..
              فيه منهم بيلعب هجوم ومنهم بيلعب ونج يمين وونج شمال
              ومنهم بيلعب دفاع.. و2 جون كيبر..
   بدار00 يعنى المدرسه ماشيه لحد دلوقتى حلوه..
 مستكه00 ايوه حلوه وتمام التمام..
    بدار00 طيب والمدربه اللى عينتيها عامله ايه..
 مستكه00 بتشرح لهم نظرى وبعد كده بتديهم عملى.. اصل الكتب
              اللى جايباها فى الكوره دى مفيده قوى..
    بدار00 خلاص اى حاجه عايزنها اتصلوا بيا على طول..
 مستكه00 ماقولتليش انت متشيك كده ورايح على فين..
    بدار00 هقابل مدير الكره لنادى الحمام ابيع له الزغلول اللى جهزته..
                             - موسيقى-
م/5
حماده00 بقى كده ياكابتن اتصل عليك ميت مره متردش..
   بدار00 معلش.. كنت مشغول..هه  متعرفتش عليك ..
 حماده00 حماده الونش..
     بدار00 ايه اسمك الونش..
   حماده00 ايوه اسمى الونش..
     بدار00 اه الونش اللى بيلعب فى فريق الزغاليل تامن المظاليم مش كده..
   حماده00 ايوه..
     بدار00 وانت تسمع عنى..
   حماده00 طبعا انت الكابتن بدار مكتشف النجوم.. قريت اسمك كتير..
     بدار00 انا بدار السمسار فايف ستار..
   حماده00 علشان كده حبيت اقابلك.. لانى حاسس انى مدفون فى
                نادى الزغاليل..وكانى قاعد فى بنيه مش عارف اخد فرصتى..
     بدار00 يعنى ايه عايز تحترف..
   حماده00 ياريت.. او اتنقل من فريق الزغاليل.. بس اوعى حد من فريق
               الزغاليل ياخد خبر..
    بدار00 علشان ايه..
  حماده00 احسن هيعطلوا مسيرتى..
    بدار00 خلاص اطمن خالص آن الاوان تطير من البنيه  وتبقى حر طليق..
  حماده00 ايوه ياكابتن .. خلينى بقى ارفرف فى السما..
    بدار00 انا هاخدك اوضبك كده على ذوقى واخليك تحترف
              فى نادى الحمام..
                                           - موسيقى-
                                          
                                   (نهاية الحلقة 18)

                       (الحلقة التاسعة عشرة)

م/1
 حماده00 ايه ده يا كابتن ..غيرت ملمحى كده ليه.. دا انا شكلى تغير خالص..
              انا مش عارف نفسى..
   بدار00 اصول الشغل امال ايه ..
 حماده00 دا انا عن نفسى لو قابلتنى معرفنيش..
   بدار00 وهو ده المطلوب.. معرفتش نفسك يبقى محدش هيعرفك..
              وانت اشقر..يعنى هنقول انت من دولة دولة تانيه جيت مصر هنا
              تستجم ولبت فيها ومش عاوز تروح .. هى ايه بقى الدوله اللى
              اهلها  لونهم ناصع البياض..
 حماده00 فيه بلجيكا وفيه سويسرا ..و..
   بدار00 خلينا فى بلجيكا.. انت دلوقتى  بلجيكى ابن بلجيكى..
 حماده00 والعربى اللى باكلمه..
   بدار00 هتغيره..
حماده 00 يعنى ايه هكلم انجليزى..
   بدار00 انجليزى فرنساوى المهم مايعرفوش انك بتكلم عربى..
 حماده00 دا صعب قوى..ازاى..
   بدار00 مع بدار سمسار فايف ستار سهل باذن الله.. بس اتبع التعليمات..
                                         - موسيقى-
م/2
    بدار00 هه زى مافهمتك يا ونش..
  حماده00 حاضر ياكابتن..
    بدار00 عارف هتعمل ايه..
  حماده00 ايوه..
    بدار00 طيب يلا بينا..
  حماده00 بس يا كابتن كده مش بنضحك عليه..
    بدار00 لاء اسمع بس مش الكوره غالب ومغلوب..
  حماده00 اى..
    بدار00 والمسابقات معموله ليه مش علشان الفرق تتصارع فى الحصول
              على الدرع.. والصراع ده مش مشروع فى عرف الرياضه..
  حماده00 ايوه..
    بدار00 خلاص .نبقى احنا كمان فى المعمعه دى.. يعنى كلنا ايه..فى الهوا سوا..
              او زى ماتقول كده زى القط والفار..والعبره بمين يكسب فى نهاية
              الهاف تيم..
                                         - موسيقى-
                                           
م/3  
      بدار00 اهلا يا كابتن ابو حمام..
 ابوحمام00 مين بدار السمسار.. يا اهلا يا مرحبا.. اتفضل اتفضل..
      بدار00 شكرا..
 ابوحمام00 ايه ياراجل ده ايه اللى انت عامله ده.. كلمنى فهمنى انت فين كل ده..
      بدار00 تحت النظر يا كابتن..
 ابوحمام00  دا انا متابع خط سيرك وكنت عايز اتصل بيك..
     بدار00 ماتصلتش ليه ياكابتن..
 ابوحمام00 كنت مشغول فى حل قضية لاعب من الفريق.. بس انا عرفت
                انك جبت لاعب انتيكه قوى لفريق النخيل من بره.. وكنت عايز زيه..
      بدار00 وماله يا كابتن.. لكن..
 ابوحمام00 لكن ايه اوعى تقول نفذ رصيدك احس مابحبش الكلمه دى..
      بدار00 لا ياكابتن انا معايا خط..
 ابوحمام00 خلاص شوف لى واحد كده يكون حريف يهزم لى الفريق
               المنافس  الماتش الجاى..
     بدار00 وانا عندى طلبك.. بس يعنى كنت باقول ماهو المحلى احسن وافضل..
                المحترف الاجنبى هيكلفك كتير.. ويعنى لمؤخذه فى ديك هٍالكلمه
                لما تطلع الممتاز نجيب لك محترف من اى دوله ياسيدى..
 ابوحمام00 انا عارف ايه اللى عايز تقوله.. عايز تقول ان احنا بنلعب فى
                الممتاز (ب) وكمان اقاليم .. مش كده..
     بدار00 يعنى كل ..
ابوحمام00 اكملك ان كل برغوط وعلى قد دمه.. اه اصل انا بفهمها وهى طايره..
     بدار00 (يضحك) ههههه ماهو باين ماكنتش تبقى ابوحمام..
ابوحمام00 اصل انت متعرفش.. ان الفريق اللى فيه محترف اجنبى اليومين
               دول بتتكلم عليه الصحافه.. وبتعمله دوشه..وصيته بيبقى عالى ودايما
                فى الصداره..
     بدار00 لا لا ياكابتن..هذه المقوله انا مش معاك فيه ولكن الايام هتثبت لك
               عكس الكلام ده وتبقى تقول الكابتن قال..
ابوحمام00 طيب انا عايز لاعب من ايتها دوله ..اجرب النوع ده اشمعنا منافسينى ..
    بدار00 اطمن ياكابتن.. بعد ساعه هيكون عندك لاعب بلجيكى انما ايه
               تاكل صوبعك واراه.. قصدى هتبوس ايدك وش وضهر..
               يلا سلام..
ابوحمام00 سلام.. مع السلامه..
               (صوت طرق اقدام تتباعد)
               (لنفسه) الله هو زى مايكون عاينهم فى التلاجه ولا ايه..
                                       - موسيقى-
                                            
م/4
     بدار00 يلا ياكابتن هتقابل ابو حمام.. يلا خطوه لقدام..الى الامام الى الامام..
   حماده00 انا جاهز يا كابتن بدار..
     بدار00 طيب يلا احسن ابوحمام منتظرك على نار..
   حماده00 طيب لوسألنى عن اسمى اقوله ايه..
     بدار00 اه قوله  قوله...اسمى ..شوباشو..
   حماده00 شوباشو.. ده اسم برضه من حماده الونش اللى كان بيهز
               الملاعب لشوباشو..
     بدار00 ايوه شوباشو.. كلمه مش عربى ..ومش هيفهما وانت لوانزنقت
               فانا هرد وراك على طول.. متخفش..
   حماده00 ازاى يعنى..
     بدار00 يعنى انا هافهم واحاول اشوشر عليه.. واقول اجنبى اجنبى..
               وحاول انتى بقى تساوى الموقف..
   حماده00 ماشى يلا بينا.. اهو صحيح الحياة تجارب..
     بدار00 استنى باقولك ايه علشان تقتنع وابقى انا راضى.. انت مابتسمعش
               عن لاعيبه بتختار اسم شهره لها..
  حماده00 بسمع..
    بدار00 ولاعيبه بتعمل فى شعرها تقاليع .. منهم اللى بيغير لون شعره ومنهم
              اللى بيطوله ومنهم اللى بيشيله خالص..
  حماده00 بشوف ..
    بدار00 ولاعيبه بتكلم بلغه تميزهم عن لغتهم الاصليه..
  حماده00 بتكلم..
    بدار00 امال عاوز ايه يلا بنا ياونش .. قصدى ياشوباشو..
                                   - موسيقى-

                          (نهاية الحلقة 19)

                       (الحلقة العشرون)
م/1
       بدار00 جبت لك اللى على مزاجك ياكابتن حمام..
 ابو حمام00 يا اهلا بيك وبه.. اتفضلوا..
      بدار00 اقعد ياكابتن..
    حماده00 موه..
  ابوحمام00 بيقول ايه..
      بدار00 بيقولك متشكر وممنون ..
 ابوحمام00 متشكر وممنون فى موه دى عجيبه..
     بدار00 لغه بلجيكيه بقى..
 ابوحمام00  لغه مختصريعنى مش كده..
     بدار00 امال.. هه نسيب الحمار بقى ونمسك فى البردعه..
 ابوحمام00 مش المهم البردعه.. المهم الحمار.. لان منعرفش نركب على
                البردعه من غير الحمار.. لكن نعرف نركب الحمار من غير
                البردعه ..مش كده برضه ولا ايه..
      بدار00 صح وجهة نظر معمليه ياكابتن..
  ابوحمام00 طيب قولى بقى تقدره بكام الاخ ده..
      بدار00 حسب اسعار السوق..
 ابوحمام00  يعنى كام انت سمسار وعارف..
      بدار00 فى الحاله دى هو بيناطح نجوم كبار.. يعنى تمنه  مليون
                 خالص مخلص.. غير عمولتى..
  ابوحمام00 ياه ايه ده هى الاسعار غليت كده ..
      بدار00 امال هو فيه حاجه بتقعد على حالها ياكابتن..
  ابوحمام00 لاء.. دليل على كده الاسبوع اللى فات كنت بجيب الكيلو
                الاوطه ب4جنيه .. النهارده الست حرمنا اشترتها ب 5 جنيه..
      بدار00 جشع ياكابتن جشع..
  ابوحمام00 هه وعلشان خطرى..
      بدار00 بنص مليون مليون بس ياكابتن..وعملت لك تخفيض ماعملتوش لحد..
  ابوحمام00 شكرا ياكابتن بدار علشان يبقى بنا بزنس تانى.. ويدوم
                 ياسيدى المعروف..قولى صحيح بيعرف عربى..
      بدار00 مكسر..
  ابوحمام00 طيب هاته نعاينه  ونساله عدة اساله..
      بدار00 اتفضل يا كابتن..
  ابوحمام00 ياكابتن اسمك ايه..
      بدار00 وات سيور نيم..
  حماده00 ماى نيم از شوباشو..
ابوحمام00 شوباشو..  ياسلام دا البنيه كلها هتنور.. بس انا زى ما يكون شوفتك
              قبل كده.. فين يابوحمام فين يابو الزغاليل.. هفتكره..
                                            - موسيقى-  
 م/2
      بدار00 لالالا شوفته فين بس ياكابتن.. اكيد طبعا وانت بتتفرج على
                 ماتش فى التليفزيون..
 ابوحمام00 اظاهر برضه.. طيب.. ادينا بقى الاعب وخد فلوسك.. بس..
      بدار00 بس ايه..
 ابوحمام00 بس يعنى لونزلته الماتش الجاى قدام نادى المراجيح الصاعد هيجيب
                لى جون..اصل محتاج للتلاته بنط علشان تمنعنى من الهبوط..
      بدار00 ايوه ياكابتن هيجيب مرجيحه قصدى جون..
 ابوحمام00 يسمع من بؤك ربنا احسن نفسى فى ال3 بونط دول باى طريقه
                موقفى حرج جدا..
                                           - موسيقى-
م/3
مستكه00 عملت ايه يابدار طمنى..
   بدار00 كل خير يامستكه.. ابوحمام عكمنى  ربع مليون..
مستكه00 ياسلام ايه ده ربع مليون كله..
   بدار00 انا لو كنت بتوسط بين نادى ونادى ماكنتش خدت المبلغ ده..
             انما بقى لعبة تلميع اللاعب دى جديده متخطرش على بال اجدعها
              سمسار..
مستكه00 لاء ولسه لما اللاعيبه الاشبال اللى فى المدرسه  لما يستوم..
   بدار00 يستوم.. انتى يامستكه طبخطيهم..
مستكه00 قصدى يعنى لما ياخدوا حقهم فى التعليم واللعب على اصوله..
   بدار00 ايوه.. دول هخدهم على طول واغذى بهم النوادى.. واتضح يامستكه
             ان حكاية اللاعب المحترف او الاجنبى دى مسيطره على نفوخ
             كل الفرق..كل واحد فيهم بيطلب الاجنبى وميهموش  الدفع..
مستكه00 اى ماهو فاكرين ان اللاعيبه دى هى اللى بتصعد الماتش ويجيبوا
              لهم الهدف اللى همه عايزينه..
  بدار00 وهمه ميعرفوش ان دول مصريين ميه فى الميه.. رغم ان
             لو دوروا بين شباب مصر هيلاقوا كنوز وكنوز..
مستكه00 وطول ماهمه غافلانين كده ..اكشف انت برحتك براحتك وصدر لهم..
   بدار00 بس انا حاسس انى بكدب عليهم يامستكه..وضميرى مش مستريح.
مستكه00 لاء دى مش كدب..انت بتضحك عليهم لانهم برضه بيزيدوا فى
             العناد..
   بدار00 يعنى كده مابعملش حاجه غلط..
مستكه00 انت بتقدم لهم خدمه العمر..
   بدار00 مانى بقول كده برضه..
مستكه00 وفى الحاله دى اسمها كدبه بيضه.. ومادومت بتعمل الخير ميهمكش ..
                                          - موسيقى-
م/4
 ابوحمام00 انا ناديت عليك علشان اقولك عن حاجه مهمه خالص..
     بدار00 خير ياكابتن ابوحمام..
 ابوحمام00 شوماشو ده اول ماصبح الصبح غسل وشه بالميه لقيته اتغير
                خالص وبقى واحد تانى..
     بدار00 يعنى ايه..
 ابوحمام00 يعنى بقى واحد غير بتاع امبارح.. ايه الحكاية دى..
     بدار00 اى اظاهر ياكابتن ان شوماشو ده كان بيغسل بمايه غير اللى عندنا..
 ابوحمام00 ازاى مش المايه اللى عندنا زى اللى عندهم بالظبط.
     بدار00 لاء طبعا.. هى ماية النيل فيه زيها فى العالم.. كل قطر وله مايته..
 ابوحمام00 (باستغراب) معقول.
     بدار00 مش معقول ليه .. ماية النيل بتزيح الهم والغم .. ماسمعتش
                اغنية ماشربتش من نيلها..
 ابوحمام00 سمعتها..
     بدار00 طيب وادى النتيجه.. ماغسلتش منها..
 ابوحمام00 صحيح ياولاد..العلم نور..
     بدار00 وكمان هو اشقر يعنى لونه بيتغير.. الملاعب ياما فيها العجب..
 ابوحمام00 ياسلام يعنى كده يبقى عندى لاعب بالالوان الطبيعيه..
                                   - موسيقى-
                           (نهاية الحلقة 20)








ليست هناك تعليقات:

مقال بقلم/ فوزى اسماعيل

                                                      تحية لرجال كفر الشيخ مفتاح لسعيهم فى عمل الخير اقر وأعترف بأن رجال كفر الشيخ مفتاح...